Коронавирусээр өвчлөөд эдгэсний дараа цус шингэлэх эмчилгээ зайлшгүй шаардлагатай

Коронавирусийн халдвар аваад эдгэрсэн хүмүүст нийтлэг илэрч байгаа шинж тэмдгийн нэг нь цус өтгөрөл, зүрх судасны өвчлөл байна. Үүнийг тоохгүй яваад байвал судас бөглөрөх зэргээр олон төрлийн эрсдэл дагуулна. Халдварын дараа зүрх, судсаа хэрхэн нөхөн сэргээж, өвдөөгүй үеийнх шигээ эрүүл зүрхтэй байх талаар ШУГТЭ-ийн Зүрхний мэс заслын тасгийн эмч Ж.Эрдэнэсүрэнгээс тодрууллаа.

“Коронавирусээр өвчлөөд эдгэсний дараа цус шингэлэх эмчилгээ зайлшгүй шаардлагатай”Коронавирусээр өвдөөд эдгэрсэн хүмүүсийн эрүүл мэндэд олон асуудал тулгарч байна. Ихэвчлэн ямар хүмүүст энэ өвчний дараа зүрх, судасны асуудлууд үүсэж байна вэ?

-Зүрхний цусан хангамжийн хямрал, зүрхний өвдөлтийн хувьд ковидын дараа хамгийн их илэрч байгаа нь зүрхний хэм алдагдал байгаа юм. Харин хоолойны ангина нь үе мөч, зүрхэндээ орчихсон тохиолдлын тухайд сүүлийн үед харьцангуй намжмал байж байгаад ковидын дараа сэдрэх тохиолдол ч байна. Түүнчлэн артерын судасны бөглөрлөөр хүндэрсэн хүн их ирж байгаа. Цус өтгөрнө гэдэг маш их эрсдэлтэй. Дээрээс нь чихрийн шижин, захын артерын судасны нарийсалтай байж байгаад цус өтгөрвөл шууд бөглөрөл үүснэ. Тэгээд хөл, гараа тайруулах зэрэг эрсдэлтэй нөхцөл байдал үүсэж байна. Өөрөөр хэлбэл суурь өвчтэй хүн коронавирус туссанаар өвчин хурдан хүндэрч байна. Өнгөрсөн шөнө гэхэд Дорноговь аймгаас нэг өвчтөн гарын артерийн судас бөглөрсөн байдалтайгаар хүргэгдэж ирсэн. Энэ хүн хүн артерийн судасны өвчтэй байсан бөгөөд үүн дээрээсээ коронавирусийн халдвар аваад 10 хоног эмчлүүлжээ. Өөрөөр хэлбэл суурь өвчин коронавирустэй хавсарч биеийн байдал хүндэрсэн гэсэн үг. Одоо гар, хөлийн үзүүрээсээ харлаж, үхжих эрсдэлтэй болсон байна. Манай орон эрс тэс уур амьсгалтай, хүн зон нь холестрины хуримтлал ихтэй. Түүнчлэн захын артерын судасны өвчлөлтэй, зүрхний цусан хангамж дутагдлын хямралтай зэрэг суурь өвчлөл ихтэй байгаа юм. Угаасаа ийм асуудалтайн дээрээс коронавирус нэмэгдчихээр улам хүндэрч байна. Коронавирусээр өвчилсний дараа яг энэ өвчнөөс болоод зүрхний шигдээс болчихлоо гээд хэлэх боломж одоогоор алга. Энэ бүхэн судалгаа шинжилгээний шатанд явж байна. Бүх зүйлийг коронавирус руу чихэхээсээ илүү коронавирусийн тодорхой хэмжээний үр дагавар нь суурь өвчлөлийг илүү хүрдан хүндрүүлж байна гэдгийг ойлгох хэрэгтэй.

Коронавирус зүрхийг яг яаж өвчлүүлдэг юм бэ?

-Коронавирусийн халдвар бол уушгины цулцангийн яг агаарын солилцоо хийдэг тэр хэсгээс эхлээд гэмтээдэг учраас аягүй төвөгтэй өвчин. Маш хурдан хугацаанд уушгины эдийн хатуурал үүсгэдэг. Үүнтэй холбоотойгоор хийн солилцоо хийдэг процесс алдагддаг. Тэгээд ирэхээрээ зүрхний ачааллыг улам ихэсгэдэг ингээд бие биенээ улам хүндрүүлээд байдаг. Бас нэг юм нь амны хаалтны хэрэглээ. Байнга амны хаалт зүүгээд яваад байхаар захын судсан дахь хүчилтөрөгчийн дутагдал тодорхой хэмжээнд байгаад байна. Уушги гүйцэт ажиллахгүй, байнга амны хаалттай байхаар байхаар амьсгалын үйл ажиллагааны хямрал зүрхээ ачааллуулж байна. Ингэхээр энгийн үедээ өвдөхгүй, ачаалал авахгүй байсан зүрх ковидын дараа илүү ачаалал авч байгаа юм. Тийм учраас байнга маск зүүхээс илүү амарч байх хугацаандаа агаар салхинд гарах нь хамгийн чухал.

Өвдөөд эдгэрсэн хүмүүс зүрхээ яаж нөхөн сэргээх юм бэ? Ямар эмчилгээ та зөвлөх вэ?

-Ковидын дараа амьсгал давчдах, амьсгаадах, ядрах, шөнө нойргүйдэж тавгүйтэх, нойргүйдсэнээсээ болоод хямарч зүрхээр хатгуулах, зүрх дэлсэх, амьсгал бачуурах зэрэг хам шинж илэрч байна. Коронавирусээр өвчлөөд эдгэснийхээ дараа уушгины нөхөн сэргээх эмчилгээ хийлгэхээс гадна цус шингэлэх эмчилгээг заавал хийх ёстой. Ялангуяа 50-аас дээш насны хүмүүс. Манайхан замбараагүй шинжилгээ өгдөг, гэрээрээ тариа тариулдаг зэргээсээ болоод судасны ханаа гэмтээх нь элбэг. Үүнээс үүдээд ч бөглөрөл үүсэж болно гэдгийг анхаарах ёстой. Хоол хүнс, эрүүл ахуй талдаа анхаарах хэрэгтэй байгаа юм. Монголчууд маш их давс хэрэглэдэг. Давсны хэрэглээ судас хатуурал, даралт ихсэлтийн нэг дэвсгэр. Түүнчлэн амьтны гаралтай ханасан өөх тосны хэт их хэрэглээ, орчин үеийн суугаа ажил, хөдөлгөөнгүй байдал зэрэг нь хэвлийн таргалалт үүсгэж байна. Энэ нь судасны хананы холестрины хуримтлал буюу хатуурлыг эрт үүсгэж байгаа. Тэгээд коронавирусийн халдварын улмаас их хүндэрч байна. Иймээс эхний ээлжинд давсны хэрэглээгээ бууруулж, өдөрт уух усны хэмжээгээ нэмэх хэрэгтэй. Тэгээд эмчийн заавраар цус шингэлэх эм, эмчилгээ хийлгэх нь зөв юм.

Эх сурвалж: Eagle.mn