​‘Пфайзер’ вакцины гурван тун ‘Омикрон’ хувилбарыг саармагжуулдаг гэх үр дүн гарчээ

АНУ-ын биотехнологийн “Pfizer” болон Германы “BioNTech” компанийн эрдэмтэд лхагва гаригт “COVID-19”-ийн эсрэг “Коммирнати” вакцины гурван тун “SARS-CoV-2” вирусийн Омикрон хувилбарыг өндөр үр дүнтэй саармагжуулдаг гэх судалгааг танилцууллаа.

Энэ нь дэлхийн хэмжээнд Омикрон хувилбарын эсрэг вакцины үр нөлөөг тодорхойлсон анхны судалгаа болсон юм. Улмаар бүүстер тунгийн тарилга нь цар тахал, тэр дундаа коронавирусийн шинэ хувилбарын эсрэг гол зэвсэг болох боломжтой гэх дүгнэлтийг хийсэн байна.

Судалгаанд дурдсанаар Коммирнати вакцины хоёр тунгийн тарилга нь хүний биед Омикрон хувилбарын эсрэг харьцангуй бага хэмжээтэй саармагжуулах эсрэг бие үүсгэж байсан аж. Гэхдээ энэ нь ковидын халдвараар хүндээр өвчлөх эрсдэлээс хамгаалах хэмжээнд байсан гэжээ.

Харин гурав дахь буюу бүүстер тунд хамрагдаад дор хаяж нэг сар болсон сайн дурын оролцогчдоос цуглуулсан цусны дээжид шинжилгээ хийхэд Омикрон хувилбарын эсрэг өндөр хэмжээтэй саармагжуулах эсрэг бие үүссэн болохыг тогтоосон байна. Тухайлбал, үр дүнгийн хувьд хоёр тунгийн тарилгаар Хятадын Уханьд бүртгэгдсэн “SARS-CoV-2” вирусийн анхны хувилбарыг саармагжуулж байсантай ижил үр дүнд хүрчээ. Коммирнати вакцин нь вирусийн анхны хувилбарын эсрэг 95 хувийн үр дүнд хүрч байв.

Мөн “BioNTech”-ын Гүйцэтгэх захирал Угур Сахин улс орнууд Омикрон хувилбарын тархалттай тэмцэхийн тулд вакцины хоёрдугаар тун болон бүүстер тунгийн тарилгын зайг богиносгохыг санал болгосон байна. Жишээ нь, Их Британи өмнө нь зургаан сар байсан хоёр болон гурав дахь тунгийн хоорон дахь тарилгын зайг гурван сар болгож богиносгосон.

Түүнчлэн “Pfizer” болон “BioNTech”-ын удирдлагууд шаардлагатай тохиолдолд Омикрон хувилбарын эсрэг зориулагдсан сайжруулсан вакциныг 2022 оны гуравдугаар сар гэхэд нийлүүлэх боломжтой талаар мэдээлсэн байна.

Эх сурвалж: Itoim.mn Reuters