ОХУ хамрын цацлага хэлбэрийн ковидын эсрэг вакцины туршилтыг эхлүүллээ

ОХУ-ын Гамалеян нэрэмжит тархвар судлал, микробиологийн судалгааны хүрээлэн хамрын цацлага хэлбэрийн “COVID-19”-ийн эсрэг “GamCovidVac” вакцины эмнэлзүйн туршилтыг эхлүүлэх зөвшөөрөл авсан байна.

Ингэснээр вакцины үр дүн, аюулгүй байдлыг судлах клиникийн туршилтыг явуулах боломж нээгдэж байгаа юм.

Гамалеян нэрэмжит тархвар судлал, микробиологийн судалгааны хүрээлэнгийн захирал, доктор Александр Гинцбург “Одоогоор вирусийн эсрэг GamCovidVac вакцины үр дүн хараахан батлагдаагүй байгаа ч клиникийн өмнөх туршилтаар хамрын цацлага хэлбэрийн вакцин нь ямар нэгэн гаж нөлөөгүй, аюулгүй болох нь тогтоогдосон” гэжээ.

ОХУ дахь халдварын тархалт цар тахал эхэлснээс хойших хамгийн хүнд нөхцөл байдалд байгаа юм. Тухайлбал, сүүлийн нэг сар орчмын хугацаанд тус улсын хэмжээнд өдөрт шинээр илрэх тохиолдлын тоо тогтмол 30-40 мянга давж, нийт өвчлөл 9.4 саяд хүрсэн. Улмаар нэг сая хүн тутамд ногдох нас баралт 1830 хүрсэн нь 100-аас дээш сая хүн амтай улс орнууд дунд АНУ болон Бразилын ард бичигдэх үзүүлэлт юм.

Гэвч өнөөдрийн байдлаар ОХУ-ын нийт хүн амын ердөө 37.5 хувь нь “COVID-19”-ийн эсрэг вакцины бүрэн тунд хамрагдсан байна.

Александр Гинцбург үзэж байгаагаар тус улс дахь өнөөгийн халдварын тархалтыг бууруулахын тулд вакцинжуулалтын явцыг 4-5 дахин нэмэгдүүлэх шаардлагатай аж. Хэрэв ингэж чадсан тохиолдолд ОХУ гурван сарын дараа гэхэд сүргийн дархлаанд хүрэх боломжтой гэх байр суурийг илэрхийлжээ. Тиймээс хэрэглэхэд хялбар буюу хамрын цацлага хэлбэрийн вакцин эмнэлзүйд нэвтэрснээр дархлаажуулалтыг нэмэгдүүлж, сүргийн дархлаа тогтооход томоохон түлхэц болох юм.

Тэр ч утгаараа ОХУ-ын Ерөнхийлөгч Владимир Путин өнгөрөгч сард “GamCovidVac” вакцины туршилт, судалгаа, санхүүжилтийг бүрэн шийдэж, анхаарч ажиллахыг Засгийн газартаа даалгасан.

Тэгвэл ОХУ-ын Ерөнхий сайд Михаил Мишустин лхагва гаригт Засгийн газрын хуралд оролох үеэрээ судалгааны завсрын тайланг судалгаа эхэлснээс хойш 42 хоногийн дараа танилцуулна. Улмаар эмнэлзүйн туршилтын гуравдугаар үе шатыг бүртгэлийн ажилтай хамт эхлүүлнэ. Мөн хамрын цацлага хэлбэрийн “COVID-19”-ийн эсрэг “GamCovidVac” вакциныг үйлдвэрлэх хөрөнгийг төсөвлөсөн талаар мэдээлсэн юм.

Эх сурвалж: Itoim.mn TASS