Эцэг эхийн хүсэлтэд үндэслэн 4-5 настай хүүхдүүдийг цэцэрлэгт элсүүлнэ

Энэ хичээлийн жилд 4 болон 5 настай хүүхдүүдийг эцэг эхийн хүсэлтэд үндэслэн 9 дүгээр сарын 1-ээс танхимын сургалтад хамруулна. Танхимын сургалтад хамрагдаагүй хүүхдийг зайн сургалтад хамруулна. Шинээр элсэх 4 болон 5 настай хүүхдийн элсэлт энэ сарын 16-25-ны өдрүүдэд болно.

Харин 2 болон 3 настай хүүхдүүдийг халдварын эрсдэлийн үнэлгээ хийгдсэний дараа ямар үе шаттайгаар хэрхэн цэцэрлэгт нь хамруулах талаар тухайн үед нь шийдвэр гаргаж ажиллах болно.

Цэцэрлэгийн анги танхимын зай талбайгаас хамаарч нэг бүлэгт 15-25 хүүхэд хичээллэх бөгөөд ариун цэврийн хэрэгсэл, хичээлийн хэрэглэгдэхүүнийг эхний ээлжид 3 сар хэрэглэх байдлаар бэлтгүүлнэ.

Дараах тохиолдолд хичээлийг зайн сургалтад шилжүүлнэ.

– 1 ангид 1 хүүхэд өвчилбөл 14 хоногийн хугацаагаар зайн сургалт руу шилжинэ,

– Тухайн давхарт 3 бүлэгт өвчлөл гарсан тохиолдолд ангийн байрлалаас хамаарч корпус болон давхраар хэсэгчлэн хаана,

– Өөр хоорондоо хамааралгүй байршилтай 3 болон түүнээс дээш бүлэгт халдвар бүртгэгдвэл цэцэрлэгийг бүхлээр нь зайн сургалтад шилжүүлнэ.

Эрсдэлээс урьдчилан сэргийлэхэд эцэг эхчүүдийн оролцоо чухал юм

Эцэг эхчүүд дараах зөвлөмжийг анхаарна уу. Үүнд:

– Гэр-цэцэрлэг-гэрийн хооронд амны хаалт тогтмол зүүх /ангид маск зүүхгүй/

– Гар халдваргүйжүүлэгчийг бэлтгэх,

– Гэртээ ам хоолойг байнга зайлах, гарыг тогтмол угаалгах,

– Шүдийг өглөө оройд гэртээ сайтар угаах,

– Өвчний шинж тэмдэг илэрсэн нөхцөлд цэцэрлэгт явуулахгүй байх,

– Бага насны хүүхдээ дагуулж олон нийтийн газраар явахгүй байх,

– Зайн сургалтын үед хүүхдийн хөгжлийг дэмжих чиглэлээр багштай хамтран ажиллах зэрэг юм.