Европын Холбоо байгалийн хий импортлох гэрээг АНУ-тай байгууллаа

Өнөөдөр Европын Холбоо шингэрүүлсэн байгалийн хий импортлох гэрээг АНУ-тай байгуулжээ.

АНУ-ын ерөнхийлөгч Жо Байдены айлчлалын үеэр уг гэрээг Брюссель хотод байгуулсан байна.

Гэрээний дагуу АНУ энэ онд багтаан хамгийн багадаа 15 тэрбум шоо метр хийг Европын Холбоонд нийлүүлэх юм.

Украины хямралтай холбоотойгоор ОХУ-аас байгалийн хийн хамаарлаа бууруулах зорилтыг Европын Холбоо тавиад байгаа. Тодруулбал энэ онд багтаан ОХУ-аас авдаг байгалийн хийн хэмжээгээ гуравны хоёроор бууруулах юм.

Ингэхийн тулд Европын Холбоо импортын бусад эх үүсвэрүүдээ нэмэгдүүлэх, сэргээгдэх эрчим хүчний үйлдвэрлэлээ өсгөх төлөвлөгөөтэй байна.

АНУ-ын ерөнхийлөгч Жо Байден энэ долоо хоногт Европын орнуудаар айлчилж байгаа бөгөөд дайнд нэрвэгдсэн Украин улсад туслах талаар холбоотнуудтайгаа хэлэлцэх зорилготой юм.