Жүдо, байт харвааны тамирчид тэмцээндээ өнөөдөр оролцоно

“Токио 2020” паралимпийн наадам гурав дахь өдрөө үргэлжилж байна. Тэгвэл өнөөдөр манай тамирчдын тэмцээн уралдааны салхийг хагалан байт харваа, жүдогийн тамирчид тэмцээндээ оролцоно.

Тус наадмын зургаан төрөлд манай 11 тамирчин өрсөлдөх бөгөөд өнөөдөр байт харвааны тамирчин Х.Мөнхбаатарын тоглолтоор эхлэх юм. Тодруулбал, Х.Мөнхбаатар өнөөдөр 09.00-12.00 цагийн хооронд эрэгтэйчүүдийн ST төрлөөр “Yumenoshima Park Archery Field” талбайд урьдчилсан чансаа тогтоох тэмцээнд онч мэргэнээ сорих юм. Түүний дараахан жүдо бөхийн B3 ангиллын 60 кг-д С.Ядамдорж, B3 ангиллын 66 кг жинд А.Мөнхбат нар /10.30-13.30, 16.00-18.40/ “Nippon Budokan” ордны дэвжээнд ур чадвараа сорин барилдана. Түүнчлэн энэ өдрийн 14.00-17.00 цагийн хооронд байт харвааны тамирчин Д.Сэлэнгээ эмэгтэйчүүдийн ST төрөлд урьдчилсан чансаа тогтоох тэмцээнд өрсөлдөх хуваарь гарчээ.

Л.Баяр