Улсын харцага Б.Бат-Өлзий түрүүллээ

Улс, аймгийн алдар цолтой хүчит 512 бөхийн барилдаанд улсын харцага Б.Бат-Өлзий түрүүлж, аймгийн арслан Э.Ууганбаяр үзүүрлэлээ.

Барилдааны шөвгийн дөрөвт улсын харцага Б.Бат-Өлзий аймгийн арслан Т.Довчинсэмбээтэй оноолт тааран найм давсан бол аймгийн арслан Э.Ууганбаяр улсын начин Ч.Батчулуунаар найм даван, хоёр бөх цааш үзүүр түрүү булаалдахаар шалгарч үлдсэн.

Улмаар хүчит 512 бөхийн барилдааны есийн даваанд улсын харцага Б.Бат-Өлзий аймгийн арслан Э.Ууганбаярыг давж, түрүү бөхөөр тодорлоо.

Энэ удаагийн барилдаанд цолгүй залуу бөхчүүд болон сумын цолтнууд багтаагүй бөгөөд улсын аварга дөрөв, улсын арслан гурав, улсын гарьд тав, улсын заан ес, улсын харцага 18, улсын начин 64, нийт 103 улсын цолтон тэргүүтэй улс, аймгийн алдар цолтой бөхчүүд зодоглосон юм.