Түлэнхийн эмнэлгийг яаралтай ашиглалтад оруулж, ЭМЯ-ны санхүүжилтийг ил болгохыг шаардав

Иргэн О.Энхмаа өмнө нь /2021.12.31/ Түлэнхийн төвийн С блокийн барилгын газарт хууль бусаар барьсан 12 давхар орон сууц, есөн давхар оффисын барилгыг нурааж, эмнэлгийн газрыг чөлөөлөхийг Эрүүл мэндийн яамнаас шаардан мэдээлэл хийсэн.

Энэ удаад Түлэнхийн төвийн А,В блокийн барилгын ажлыг гүйцэтгэсэн “Нутгийн зам”, “Цаст констракшн” компанийн удирдлагуудад албан шаардлага хүргүүллээ.

Тэрбээр “Эрүүл мэндийн яам, Барилгын хөгжлийн төвөөс Түлэнхийн төвийн В блок буюу 240 ортой эмнэлгийн барилгын ажил 98 хувьтай, гадна тохижилт нь 78 хувийн гүйцэтгэлтэй гэж мэдээлсэн.

Гэвч барилгыг яаралтай ашиглалтад оруулахгүй байгаа учраас А, В блокийн барилгын ажлыг гүйцэтгэсэн “Нутгийн зам” ХХК, “Цаст контракшн” ХХК-д шаардлага хүргүүлж байна. Өөрөөр хэлбэл, барилга яагаад ашиглалтад орохгүй байгаа, хэрэв ажил дуусаагүй бол яаралтай дуусгах, Эрүүл мэндийн яамнаас хэдэн тэрбум төгрөгийн санхүүжилт авснаа мэдээлэх, бүх гэрээний нөхцөлийг ил болгохыг шаардаж байна.

Анх Түлэнхийн төвийн хуучин барилгыг 2011 онд нураахад 16400 метр квадрат газартай байсан. Гэтэл өнөөдөр 7339 метр квадрат болж, 9500 метр квадрат талбай нь хувийн эзэмшилд шилжчихээд байна. Мөн шинэ барилгын ажилд нийт 34-35 тэрбум төгрөг зарцуулаад байхад Түлэнхийн эмнэлгийг ашиглалтад оруулахгүй, ард түмний эмчлүүлэх эрхийг ноцтой зөрчиж байгаа асуудлаар би бүх шатны байгууллагад хандлаа. Сүүлд Ерөнхий сайдад хандсан ч шийдэж өгөхгүй байгаа тул энэхүү мэдэгдлийг хийж байна.

Бид “Нутгийн зам” ХХК, “Цаст контракшн” ХХК-иудыг сар шинийн баяраас өмнө Түлэнхийн төвийн барилгыг яаралтай ашиглалтад оруулахыг шахаж, шаардана” гэв.

Түлэнхийн төв эмнэлгийн А блок /2021.11.16/
Түлэнхийн төв эмнэлгийн А блок /2021.11.16/

Кувейтийн Засгийн газрын санхүүжилтээр шинэ Түлэнхийн төвийн барилгын ажил албан ёсоор 2017 онд эхэлсэн. Гэсэн ч санхүүжилт байхгүй, тендерд шалгарсан компани ажлаа хийхгүй байна, газрыг нь худалдаад, орон сууц барилаа зэрэг асуудал хөндөгдсөөр арван жилийн хугацаа өнгөрчээ.

Улмаар өөрийн байргүй Түлэнхийн төв эмнэлгийн эмч нар таван удаа нүүдэл хийж одоогоор ГССҮТ-ийн дөрвөн давхарт буюу хүүхдийн тасагт 30 ортойгоор үйл ажиллагаа явуулж байна.

XI хороололд байрлах хуучин барилгаасаа гарахаас өмнө Түлэнхийн төв 150 ортойгоор үйл ажиллагаа явуулж байсан бол ГССҮТ-ийн нэг давхарт очсоноор 60 орон дээр 80 хүн багтаах төлөвлөгөөтэй ажиллав. Харин өнөөдрийн байдлаар 30 оронд 40 хүн багтаах “даалгавар” гүйцэтгэж байгааг Түлэнхийн төвийн их эмч А.Ерлан ярьсан юм.