Хоногт 634 тохиолдол бүртгэгдэж, 11 хүн нас барлаа

ЭМЯ-аас “Ковид 19” цар тахлын нөхцөл байдлын мэдээг 2021 оны арваннэгдүгээр сарын 24-ны байдлаар танилцууллаа. Улсын хэмжээнд сүүлийн 24 цагийн хугацаанд 634 тохиолдол шинээр илэрсэн байна. Үүний 342 нь нийслэлд, 292 нь орон нутагт бүртгэгджээ.

Хоногт 11 хүн нас барж, нийт нас баралтын тоо 1896 болсон байна. Нас барсан иргэдийн зургаа нь эрэгтэй, тав нь эмэгтэй байсан бөгөөд 41-60 насны гурав, 61-80 насны долоо, 80-аас дээш насны нэг хүн нас баржээ. Нас барсан иргэдийн ар гэр, төрөл төрөгсдөд гүн эмгэнэл илэрхийлье.

Эмнэлэгт хэвтэн эмчлүүлж байгаа иргэдийн тоо 7378 байгаа бол гэрийн хяналтад 14692 хүн өрхийн эмчийн хяналтад эмчилгээ үйлчилгээ авч байна. Эмнэлэгт хэвтэн эмчлүүлж байгаа нийт өвчтөнүүдийн 2961 нь хөнгөн, 3379 нь хүндэвтэр, 887 нь хүнд,151 нь маш хүнд өвчилсөн иргэд байна. Үүнээс эмнэлэгт 1439 хүүхэд, 228 жирэмсэн эмэгтэй хэвтэн эмчлүүлж байна.