Ковидын эсрэг ‘Молнупиравир’ эмийг Монголд оруулж ирнэ

“Ковид-19”-ийн халдварын эсрэг ууж хэрэглэх зориулалттай эмийг гарган авснаа АНУ-д бүртгэлтэй хоёр ч компани зарлаад буй. Тодруулбал, АНУ-ын “Merck Sharp & Dohme” компани коронавирусийн эсрэг “Молнупиравир” эмийг гарган авч, саяхан Их Британийн Эм, эрүүл мэндийн бүтээгдэхүүнийг зохицуулах агентлаг эмнэлзүйд хэрэглэх анхны зөвшөөрлийг олгосон юм.

Хоёр дахь нь АНУ-ын биотехнологийн “Pfizer” компани “Ковид-19”-ийн эсрэг “Паксловид” эмийн клиникийн туршилтын үр дүнг танилцууж, тус компани дэлхийн хөгжил буурай 95 улсад уг эмийг үйлдвэрлэж, борлуулах гэрээг НҮБ-ын Эмийн патентын сантай байгуулсан билээ.

Эдгээр компанийн гарган авсан эм нь хоёулаа коронавирусийн халдвараар өвдсөн хүмүүс шинж тэмдэг илэрснээс хойш 3-5 хоногийн дотор ууж хэрэглэх зориулалттай вирусийн эсрэг үйлчилгээтэй юм. Хамгийн гол нь, коронавирусийн халдвар хүндэрч эмнэлэгт хэвтэх, цаашлаад нас барах эрсдэлийг бууруулахад чухал нөлөөтэй нь эмнэлзүйн судалгаагаар баталгаажсан байна. Өөрөөр хэлбэл, коронавирусийн халдвараар өвдөх, давтан өвдөх үед тухайн вирусийн эсрэг үйлчилгээтэй дээрх эмүүдийг ууссанаар хүндрэлгүй эдгэрэх нөхцөл бүрдэж байгаа юм.

Тэгвэл “Монос” групп АНУ-ын “Merck Sharp & Dohme” компаний бүтээсэн коронавирусийн эсрэг “Молнупиравир” эмийг Монгол Улсад оруулж ирэхээр болжээ. Тус компани “Молнупиравир” эмийг худалдан авах эхний захиалгаа өгч, батагаажсан байна. Одоо Эрүүл мэндийн яамнаас “Молнупиравир” эмийг Монгол Улсын эмийн жагсаалтад бүртгэж, албан ёсоор коронавирусийн эмчилгээний стандартад оруулахыг хүлээж байна гэж “Монос” группын дэд ерөнхийлөгч Л.Эрдэнэчимэг мэдээлэв.

“Ковид-19”-ийн эсрэг “Молнупиравир” эм нь хүний биед тухайн вирус үржих чадварыг бууруулж, ковидын халдвараар өвдсөн иргэд хүндэрч, эмнэлэгт хэвтэх эрсдэлийг хоёр дахин бууруулж, хурдан илааршихад нөлөөтэй байна гэсэн эмнэлзүйн судалгааны үр дүн гарчээ. Их Британийн Эм, эрүүл мэндийн бүтээгдэхүүнийг зохицуулах агентлагаас уг эмийг коронавируст халдвараар хөнгөн болон хүндэвтэр өвдсөн хүмүүс шинж тэмдэг илэрснээс тав хоногийн дотор /аль болох эрт/ өдөрт хоёр таблетыг уухыг зөвлөжээ. Мөн архаг хууч өвчинтэй, таргалалт, чихрийн шижинтэй, хүндрэх эрсдэл өндөр хүмүүс уг эмийг хэрэглэснээр эмнэлэгт хэвтэх, нас барах эрсдэлийг бууруулахад үр дүн өгч байгаа нь туршилтаар тогтоосон гэв.