Н.Сувд: Жуковын хөшөөний ард бүтээн байгуулалт хийхэд юу нь болохгүй байгаа юм

Г.К.Жуковын хөшөөний арын талбайн газрын асуудлаар Ардын жүжигчин Н.Сувд мэдээлэл хийлээ. Тус газрыг таван компани эзэмшиж байгаа бөгөөд түүний нэг нь Ардын жүжигчин Н.Сувдын тэргүүлдэг “Монголын саран ээж нийгэмлэг” НҮТББ юм.

Тэрээр “2001 оны Удирдах зөвлөлийн хурлаас үе үеийн алдар, цуутай ээжүүдийг таниулахаар “Ээж” музейг ажиллуулах, музейгээ дагаад иргэдийг боловсруулах, гэгээрүүлэх ажиллагаа хийе гэсэн санал гарсан. Үүний дагуу төсөл бичин, зураг гаргасан. Нийслэлээс газрын асуудлыг шийдвэрлүүлэх санал тавихад Жуковын хөшөөний арын энэ газрыг олгосон байна.

Ингээд энэ музейг барих ажлыг эхэлсэн түүхтэй. 2006, 2007 онуудад музейн суурийг тавьсан. Үүний дараа Баянзүрх дүүргээс музейн газрын суурьтай нь тулгаад дөрвөн компанид газар олгосон. Улмаар хотын захиргаанаас тэр газар дээр 13 давхар орон сууж барих зөвшөөрөл өгсөн. Тиймээс музейн ажил зогсож, олон маргаан гарч шүүхдэж эхэлсэн. Гэтэл шүүхээс энэ дөрвөн газрыг хууль, дүрэм зөрчөөгүй байна гэж үзэж байгаа учраас хамтарч ажиллах шаардлагатай гэсэн юм.

Ингээд бид удирдах зөвлөлийн хурал хийж, тэр дөрвөн компанитай хамтран ажиллахаар болсон. Ингэхдээ төв гудамжаас харагдах пасадтай, “Алунгоо” эхийн хөшөөтэй байхаар тухайн дөрвөн компанийн барилгын урд хэсэгт байхаар тохирсон.

Сүүлд Ерөнхий сайд Л.Оюун-Эрдэнэ энэ газартай танилцаж, олон давхар барилга барих зохимжгүй учир хүүхэд залуучуудын чөлөөт цагийг зөв боловсон өнгөрүүлэхэд зориулсан ногоон байгууламжтай байх хэрэгтэй гэсэн чиглэл өгсөн юм билээ. Үүнийг бид баяртайгаар хүлээж авсан. Ингээд бид нөгөө дөрвөн компанитай уулзахад бид энэ төслийг дахин шинэчилж, өөрчлөх боломжгүй, харин гаргасан энэ их зардлаа яах вэ гэдэг асуудал байна гэсэн. Энэ асуудлыг шийдэхээр олон аргаар үзсэн ч чадаагүй.

Тэгээд энэ төслийг үргэлжлүүлэх “Мөнхийн сайн санаа” ХХК-аас ирж уулзаад, энэ ухсан газрыг буцааж булахад маш их мөнгө гарах юм байна. Бидэнд ийм санхүүгийн боломж байхгүй гэдгийг хэлсэн. Хэсэг хугацааны дараа бид тэр дөрвөн компанитай хамтран ажиллах боломжтой юм байна, бидний төслийг танилцуулж өгөөч гэсэн юм. Тэдний төсөл нь тэр газрыг гарааш болгоё, спорт цогцолбор, хүүхдийн тоглоомын талбай баръя гэсэн. Ингээд энэ төсөлдөө оршин суугчдын 80 хувийн дэмжсэн гарын үсгийг авсан байна. Энэ төслийг хэрэгжүүлэхэд юу нь болохгүй байгааг ойлгохгүй байгаа” гэлээ.

Б.Болор